بسم الله الرحمن الرحيم
السلام عليكم و رحمة الله و بركاته
كلمة على عجالة
العشر الأواخر على الأبواب
رمضان خلاص و كإنه ضيف و هايرحل .. أرى أني لم أحسن ضيافته و أسأل الله ان يعيننا في الأيام المتبقية آمين
ماحدش عارف مين أُعتق و مين لسة؟
لكن لسة فيه فرصة .. بل لسة فيه أعظم فرصة
مش هاطول و سريعا كده عايزة أقول
العبرة ليست بنقصان البداية بل بكمال النهاية
فنشد حيلنا و نعلي الهمم .. الرسول عليه الصلاة و السلام كان إذا دخلت العشر أحيى ليله كله .. هذا من غُفر له ما تقدم من ذنبة و ما تأخر فكيف بأمثالي؟!! ..
لو ماقدرتش تحيي ليلك كله بالطاعة فأحيي ثلثيه و لو ماقدرتش يبقى نصفه و لو ماقدرتش يبقى ثلثه و أرجو ألا تقل عن ذلك
أحيي ليلك بالصلاة و قراءة القرآن و الدعاء و الإستغفار
و لا تنسى ( اللهم إنك عفو كريم تحب العفو فاعفو عني) فلعلك تشهد ليلة القدر ... اللهم بلغنا ليلة القدر و مُن علينا بقيامها إيماناً و احتساباً و صيام نهارها إيماناً و احتساباً
يمكن أحياناً النفس الأمارة بالسوء تقولك :هاتفرق إيه ماهو انت بعد رمضان هاترجع تاني
لأ صدقني .. أخلص النية و اصدق الله .. و الذي نفسي بيده إن صدقت الله ليصدقك
أين انت من (من تقرب إلي شبراً تقربت إليه ذراعاً) و ( من أتاني يمشي أتيته هرولة)
لا تسيء الظن بالله عز و جل و تيقن من أنك إن تقربت إليه سيقربك أكثر
مرة في شهر رمضان في السنين الماضية .. واحدة قريبتي قالتلي انها متعودة و هي رايحة الدروس تدندن كلمات أغنية لكن عشان رمضان بتسكت و تذكر الله .. شيء جميل لكن لقيتها بتقول كلام فيما معناه .. إن لما رمضان يخلص هاترجع تاني .. ليه؟ .. أصل هي عارفة نفسها و كمان ماعندهاش نية تبطل
عرفت ساعتها إن فعلاً هي مش هاتثبت على حاجة بعد رمضان إلا طبعا لو شاء الله عز و جل .. و ده اللي حصل رجعت تاني لأن هي ماتبتش توبة نصوح أصلاً
فخلي بالك انت ناوي على إيه بعد رمضان؟؟
انت تبت إزاي في رمضان؟!! و لا إنت أصلاً مافكرتش تتوب!!
عشان ربنا يقبل توبتك لازم شروط ,منها العزم على عدم العودة للذنب تاني .. انت ناوي على إيه بعد رمضان؟؟
خلي بالك
دي فرصتك بعدين يمكن تنشغل كتير .. كوّن رصيدك في رمضان .. استعد لعدوك اللي ستفك قيوده بانقضاء آخر يوم في الشهر .. عايزينه ييجي يلاقينا ناس تانية .. عايزين لسان الحال يقوله انسى شخصنا القديم دلوقتي خلاص ليس لك علينا سلطان
الرسول عليه الصلاة و السلام قال ثلاثة مَنْ كُنْ فيه وجد حلاوة الإيمان و ذكر منها أن يكره أن يعود في الكفر كما يكره أن يقذف في النار
عايز تدوق حلاوة الإيمان؟
لازم تكره العودة إلى الذنوب و المعاصي بعد رمضان ككرهك الوقوع في النار ... هاه ناوي على إيه بعد رمضان؟
انت ممكن تطلع من رمضان متغير 360 درجة
ما تصتصعبش التغيير .. صدقني هو على الله هيّن
الشيخ محمود المصري قال إنه كان مغني!! شوف دلوقتي هو إيه؟ داعية إسلامي يمكن صوته واصل لبيوت المسلمين في كل أنحاء العالم .. و ربنا جعله سبب في إسلام غير المسلمين
حلا شيحا بعد ما كانت ممثلة .. و أكيد الكل أو المعظم عارفها .. دلوقتي هي أخت منتقبة و ملتزمة
يعني فيه ناس بتتغير ... بس يا ترى اتغيروا كده فجأة و لا تعبوا و حاولوا و اجتهدوا؟
اكيد تعبوا و اجتهدوا
خليك فاكر .. وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّاللَّهَ لَمَعَ الْمُحْسِنِينَ .. ده وعد من ربنا
جاهد , جاهد ثم جاهد
و هاتوصل إن شاء الله
من أعظم فرص التغيير الإعتكاف
الإعتكاف مستشفى لعلاج كل حاجة مأرقاك في حياتك
لعلاج شهواتك ,أمراض قلبك , لعلاجك لو مش قادر تتغير ,علاج للمعاصي اللي مش قادر تتخلص منها
10 أيام في جوار الله ,10 أيام في الجنة
الإعتكاف فرصة للإنقلاب ... 10 أيام تعيد فيهم حساباتك ... تتولد فيهم من جديد
اعتكف و لو لساعة و لو للحظة .. او حتى كل ما تروح المسجد لأجل الصلاة انوي الدقائق اللي هاتعدها فيه إعتكاف و اشغل وقتك بالصلاة و الذكر و القرآن و الدعاء و الإستغفار
.. ماتضيعش عليك ثواب سُنّة الإعتكاف العظيم
قال الإمام الزهري :عجباً للمسلمين , تركوا الاعتكاف مع أن النبي صلى الله عليه وسلم ما تركه منذ قدم المدينة حتى قبضه الله عز وجل
لو البنت ماقدرتش تعتكف .. يبقى في بيتها تعكف قلبها على الله ... تنشغل بطاعته و لا تنشغل عنه مش هاقول بمعصية بل بفضول أمور الدنيا (فضول الكلام و الطعام و النوم ....) و الذهاب لشراء ملابس العيد و لو بيعملوا الكحك إلخ
مش عايزة أطول عليكم لكن لعل الرسالة وصلت
و ألخصها في
^^خلي عندك هدف تطلع بيه من رمضان (انا عايز السنادي ربنا يرزقني الإستقامة بعد رمضان ,انا عايزة ألبس الحجاب الشرعي كامل ,أنا عايز أبطل اغاني ,أنا عايزة أبطل مسلسلات و أفلام ,انا عايز أقطع علاقتي بالبنت اللي أعرفها,أنا عايزة أداوم على ختمة كل شهر بعد رمضان ,انا عايزة أداوم على قيام الليل,أنا عايز ابطل تدخين.........)
اجعل هدفك نصب عينك و اجتهد و اسعى إليه في العشر الأواخر
و ماتنسوش قال صلى الله عليه و سلم ثلاثة مَنْ كُنْ فيه وجد حلاوة الإيمان و ذكر منها أن يكره ان يعود في الكفر كما يكره أن يقذف في النار
عايزين نكره الرجوع إلى المعاصي بعد رمضان عشان ندوق حلاوة الإيمان إن شاء الله
عايزين نثبت بعد رمضان .. نطلع من رمضان و احنا قلوبنا عاكفة على الله .. حياتنا كلها لله
^^و أحسن الظن بالله و تيقن مهما كنت إيه إن ربنا قادر يجعلك من أولياؤه الصالحين لكن إنت أصدق الله و استعن به و أخلص النية و اجعل توبتك توبة نصوح
^^ماتضيعوش ثواب الإعتكاف و لو لساعة و لو للحظة
...............
و أخيراً ربنا قال
لَئِن شَكَرْتُمْلأَزِيدَنَّكُمْ
نشكر ربنا إنه بلغنا رمضان و رزقنا صيام و قيام العشرين الأولى منه و نسأله يبلغنا ليلة القدر و يمن علينا بالعشر الأواخر و حسن استغلال الوقت فيهم
,,,,,,,,,,,,,,,,,,,,,,,
,,,,,,,,
,
لو حد افتكرني في الأيام الجاية مايبقاش يبخل عليا بدعوة بظهر الغيب
يدعيلي إن ربنا يَصْطَنِعْنِي لنفسه .. فهي منزلة نادراً ما ينالها أحد و أحب أن أكون ممن ينالها
لعل لن أنالها بعملي لكن لعل الله يتغمدني برحمته و يُنلني إياها
أشوفكم ليلة العيد على خير إن شاء الله
اللهم ألقي علينا محبة منك و اصنعنا على عينك و اصطنعنا لنفسك
اللهم اصرف عنا السوء و الفحشاء و اجعلنا من عبادك المخلَصين
أني مسني الضر و أنت أرحم الراحمين
و السلام عليكم و رحمة الله و بركاته
الرئيسية
الأحد أغسطس 29, 2010 9:26 pm
