إستعد ( لرمضان ) من دلوقت

إستعد ( لرمضان ) من دلوقت

السلام عليكم ورحمه الله وبركاتة

اخواني واخواتي كل سنة وانتوا طيبين ومن طاعة ربنا قريبين

رمضان قرب أوووووووووي واحنا مش مستعدين....ازاي لسة لحد دلوقتي ما استعدناش؟؟ ده القنوات الفضائية ابتدت تستعد لرمضان وابتدت تعلن عن خطتها في عرض البرامج والمسلسلات اللي هتكون في رمضان.....ده الناس اللي مش بتفكر في طاعة ربنا مانسيتش رمضان وبتجهز خطة لرمضان.....طاب احنا جهزنا خطة طاعاتنا في رمضان ولا لا؟؟

طاب تيجوا نبتدي من النهاردة.... خلاص من النهاردة لسانا مش هيبطل يدعي (اللهم بلغنا رمضان) ايوا من النهاردة والمفروض كمان نكون بندعي بالدعوة دي من 4 شهور فاتوا اقتداء برسولنا الكريم صلوات ربي وسلامه عليه والصحابة رضي الله عنهم وارضاهم اللي كانوا يفضلوا 6 شهور قبل رمضان يدعوا ربنا يبلغهم رمضان......

لكن اللي مبتداش يلا مع بعض نبتدي من النهاردة (اللهم بلغنا رمضان)

ياتري يا جماعة مستعدين ولا لسة؟؟ لسةالقلوب بعيدة عن روحانيات ورقائق رمضان؟؟ ولا ابتدينا نحس برحمات ربنا اللي بتغرقنا في رمضان؟؟طاب مشتاقين لليالي رمضان الجميلة؟؟ايه يا جماعة قلوبكم حست واشتاقت لليالي العتق من النار ولا لسة؟؟اشتقنا للعفو ولليلة القدر؟؟اشتقنا لشهر بتفتح فيه ابواب الجنة وتغلق فيه ابواب النار؟؟اشتقنا لكل لحظة حلوة بنعيشها في اعظم شهر واكرم ضيف علينا (رمضان)؟؟

طاب ايه رأيكم يلا بينا مع بعض نعمل حملة استعداد للضيف الكريم اللي بيغرقنا بكرمه.... يلا نعمل استعداد لاعظم ضيف بينور حياتنا لايام معدودات يلا هنبتدي مع بعض من دلوقتي.... ايوا من دلوقتي....جوارحنا وعقولنا وقلوبنا لازم تستعد.... حياتنا كلها لازم تتهيأ للضيف الكريم.

يلا نعلي الهمة.... يلا نرقق قلوبنا.... يلا نعيش من دلوقتي في رمضان.... يلا نوري ربنا من انفسنا خيرا.... يلا نتعرض لنفحات ربنا الجميلة.... يلا نكون بجد مستحقين الرحمة والمغفرة والعتق من النار.....يلا من النهاردة ننوي نفوز بليلة القدر وبثوابها العظيم.....

ايه يا جماعة قلوبنا فين دلوقتي؟؟ قلوبنا ارتقت كدة وافتكرت ايام رمضان الجميلة؟؟ ابتدينا نعيش الجو الرمضاني بقلوبنا ؟؟

طاب يلا من غير ما اطول عليكم نبتدي استعدادنا بشكل عملي :

*الخطوة الاولي واللي بجد اهم خطوة في استعدادنا لرمضان

(التوبة)

يلا نتوب يا جماعة.... لو في حد فينا مصر علي معصية هقوله واقول لنفسي يلا نتوب.... يلا نتوب بقي ده رمضان اللي داخل علينا مش حاجة بسيطة ده شهر العتق من النار يا جماعة....دي فرصة عمرنا.... دي ايام ممكن تكون فيها نجاتنا.... يلا نندم ونوقف الذنوب ونعزم النية علي عدم العودة للي يغضب ربنا من تاني.... ايه رأيكم نتوب توبة عامة وشاملة من كل ذنوبنا.... تيجوا نفتح صفحة جديدة مع ربنا... يلا نردد مع بعض

(تبنا الي الله ورجعنا الي الله وندمنا علي ما فعلنا )

يلا يا جماعة قولوا معايا....الله علي التوبة....تعرفوا احنا دلوقتي بمشئية الرحمن وصدق نيتنا مع الله ذنوبنا اتحولت حسنات.

*يلا بقي يا قلوب محبها لربها ولنبيها ولدينها يلا ندخل عالخطوة التانية في خطوات استعدادنا لضيفنا الكريم

(قيام الليل)

فين همتنا بقي في قيام الليل طبعا ما ننساش ان من قام رمضان ايمانا واحتسابا غفر له ما تقدم من ذنبه
يلا بقي نبتدي نعلي همتنا في القيام.... يلا اللي بيصلي ركعتين في اليوم يزود واللي مقصر في القيام يبتدي من النهاردة ركعتين كدة ونزود واحدة واحدة....والله لو كان القيام في التلت الاخير من الليل.... يلا كدة نجهز قلوبنا ونشيل التراب اللي عليها....يلا نقرب من حبيبنا وما تخافوش مش هيسيبنا.

*نيجي بقى لخطوتنا التالتة يا أمة الحبيب المصطفى يا أمة اقرأ

(القرآن الكريم)

يلا كدة نمسك مصحفنا ونفتحه ونزود كدة وردنا اليومي.... ايوا طبعا هنزود ده رمضان يا جماعة.... يعني احنا داخلين علي شهر القران....
مسكنا مصحفنا وهنقرا... لا نستني قبل ما نقرا نتفق مع بعض اتفاق.... احنا هنقرا ازاي؟؟هنقرا بلسانا بس ولا ايه؟؟
لا طبعا لسانا بس ده ايه يلا كدة مع بعض نحضر قلوبنا ونفتحها لاستقبال اجمل رسايل ربنا باعتهالنا في اعظم كتاب....يلا كدة نغذي ارواحنا بالقران.

*ندخل علي الخطوة اللي بعدها واحنا بنصلي على حبيبنا المصطفى

صلاة النوافل(السنن المؤكدة)

اللي مقصر في السنن يا جماعة....يلا نبتدي نتعود عالمواظبة عليها....اوعوا يا جماعة حد فينا يكسل....احنا مش عارفين ولا ايه ان ثواب السنة في رمضان بفرض... في حد يسيب الثواب العظيم ده بردوا؟؟؟

*ندخل عالنقطة اللي بعد كدة بس مش هندخل عليها واحنا ساكتين يلا نقول اللهم بلغنا رمضان وأنت راض عنا غير غضبان

(الدعاء)

كلنا بقي بنجهز دعوات مخصوصة في رمضان وبنبقي عارفين ومتيقنين بالاستجابة....يلا نجهز من دلوقتي.....يلا بقي نبتدي ندعي وندعي وندعي ....يلا كدة نذل نفسنا لحبيبنا..... يلا كدة نخشع ونبكي.... يلا نبتدي نعيش اكتر مع احلي عبادة في أي وقت وخاصة في رمضان....يلا كدة نعود ايدينا علي رفعتها في الدعاء بذل وخشوع لحبيبنا الله.

*حاجة مهمة جدا يا جماعة ياريت ما ننسهاش عشان نرضي حبيبنا وننال رحمته

(صلة الرحم)

اللي قاطع رحم من رحمه يجري بسرعة ويوصله....لان كلنا عارفين ان الرحمة لا تتنزل علي قاطع رحم ....ايه عايزين نخسر رحمات رمضان علي شوية مشاكل بسيطة في الدنيا؟؟يلا نوصل اللي قطعنا.... ده احنا هدفنا الجنة يا جماعة.

*بصوا بقي اقولكم علي خطوة مهمة جدا جدا جدا وبتنقي وترقق قلوبنا بطريقة غريبة جدا ومن غير ما نحس والله ده غير ان احنا بيها بنضمن ظل عرش ربنا يوم لا ظل الا ظله

(الصدقة)

والله من احلي المشاعر في الدنيا يوم ما تطلع صدقة من كسب طيب وتبقي مستشعر بقلبك حديث حبيبك المصطفي (من تصدق بعدل تمرة من كسب طيب والله لا يقبل الا طيبا فان الله يتقبلها بيمينه ويربيها لصاحبها كما يربي احدكم فلوه، حتي يلقي الله والتمرة مثل جبل احد من الحسنات)صدق رسول الله صلي الله عليه وسلم
ياريت بقي نخلي الصدقة يومية حتي لو كانت صدقة قليلة وانا اسفة في كلمة قليلة دي لان مفيش حاجة قليلة عند ربنا (ومن يعمل مثقال ذرة خيرا يره ومن يعمل مثقال ذرة شرا يره) صدق الله العظيم
وقال حبيبي رسول الله(لا تحقرن من المعروف شيئا)صدق رسول الله
واللي ميقدرش يخرج كل يوم عشان يطلع صدقة ممكن يطلعها ويحطها في مكان مخصوص بنية الصدقة لحد ما ربنا ييسرله اخراجها.

طاب ممكن تستحملوني شوية واقول حاجة في نقطة الصدقة دي....شنطة رمضان، طبعا معظمنا عارف فكرة شنطة رمضان واللي ببساطة بيكون فيها معظم احتياجات البيت الضرورية من مواد غذائية وبتتقدم للفقراء وطبعا بيكون ثوابها عظيم جداااااااااااااا واهم ثوابين حناخدهم:
(1)افطار صائم:قال رسول الله صلي الله عليه وسلم
(من فطر صائما كان له مثل اجره من غير ان ينقص من اجر الصائم شيئا وكان مغفرة لذنوبه وعتقا لرقبته من النار) صدق رسول الله صلي الله عليه وسلم
الله علي الثواب العظيم ده.

(2)ادخال السرور علي مسلم:قال رسول الله صلي الله عليه وسلم
(من ادخل السرور علي اهل بيت من المسلمين لم يجد الله له جزاء الا الجنة )صدق رسول الله صلى الله عليه وسلم
شفتوا يا جماعة حاجة بسيطة جدا ومش هتكلفنا كتير والله هتبقي مكافأة ربنا لينا عليها الجنة،الله علي المكافأة دي....بالله عليكم في احلي من كدة مكافأة.

ياريت يا جماعة كلنا نشارك في مشروع شنطة رمضان ده....والله هتفرق معانا الحكاية دي كتير....بتعمل تغيير جذري للقلوب بترقق القلب القاسي(واسألوا مجرب)

بصوا يا جماعة هدفنا من الحملة باختصار هو تجهيز قلوبنا عشان العبادات تبقي يسيرة علينا....اكيد كلنا عارفين حالة قلوبنا اللي بتبقي عليها في رمضان ولو قارناها بحالة قلوبنا دلوقتي هنلاقي ان احنا قلوبنا بعيدة كل البعد عن الحالة الايمانية الجميلة اللي بنكون عايشينها في رمضان.... يبقي يوم ما نجهز قلوبنا هتبقي كل حاجة سهلة....يوم ما هنطلب نصلي ركعتين هنلاقي نفسنا بنصلي عشرة.....يوم ما نقول نقرا جزء قرآن هتلاقي نفسك بتقرا جزئين.... يوم ما نقول ندعي ونرفع ايدينا حتي ولو 10 دقايق في اليوم هنلاقي نفسنا مش عايزين ننزل ايدينا ومش عايزين نخلص دعاء....مش عايزين نطلع من حالة القرب والخشوع الجميلة.

خطواتنا باذن الله سهلة وبسيطة وربنا وعدنا انه هياخد بايدينا ومش هيسيبنا واحنا بنقول جايين لطريقك يارب العالمين هنعبدك ونخلص في عبادتك وهدفنا هو رضاك وجنتك وعتقك لينا من النار.

اخواني واخواتي اللي حابب يشارك معانا في حملة الاستعداد لرمضان يدخل معانا وانا بعون الله هسجل في المشاركة رقم2 اسماء كل المشاركين في الحملة....اسمائنا يا جماعة اللي هنكتبها بعون الله نقابل بيها ربنا يوم القيامة ونقوله احنا بأسمائنا ومشاراكتنا في حملتنا دي يارب كنا عايزين نقربلك وندخل رمضان واحنا مقبلين علي طاعتك وهنطلب من ربنا اننا بنيتنا الصادقة باذن الله ان يمن علينا بالعتق من النار في ضيفنا الكريم اللي هيهل علينا قريب .
وياريت اللي عنده اقتراح لطاعة معينة ننفذها مع بعض في حملتنا يشاركنا بيها ....يلاهستني مشاراكاتكم وهكتب اسم كل مشترك ومشتركة معانا في الحملة في المشاركة الجايةوهدعي ربنا من كل قلبي ان كل اسم هيتكتب في الصفحة دي يجعله من عتقاءه من النار وكل امة حبيبك محمد يارب(يارب ده ظننا فيك يارب)
يارب نيتنا في حملتنا طاعتك والفوز بجنتك وشعارنا لرمضان (لن يسبقنا إلي الله احد)
منتظرة مشاراكتكم يلا عايزين اسماء كتير....يلا احنا ظننا في الله انه هيعتقنا من النار...... يلا نسطر اسمائنا ونفوز بالعتق من النار بحسن ظننا بالله واللي طبعا هيكون مقترن بعملنا بأجمل طاعة لله رب العالمين.

يا إخواني ويا أخواتي العمل ده عمل جماعي مش عمل فردي يبقى لازم نساعد بعض ونكمل بعض ونفيد بعض، هستني منكم مشاراكات تعلي همتنا، هستنى أعضاء ايجابيين للحملة، شاركونا وأفيدونا، وماننساش أهم دعاء(اللهم بلغنا رمضان)

************

ان شاء الله كلنا نكون مستعدين

ونقدر نكسب حسنات كتير من رمضان

جزاكى الله خيرا يا رحوبة

وكل سنة وانتى طيبة

ان شاء الله يا يمنتى

جزانا واياكم

وانتى طيبه يا قمر

» 0 خطوة في شعبان للاستعداد لرمضان
» شركات المحمول تستعد لرمضان بموجة عروض
» صبح يا صبحي" أولى تجارب أحمد مكي الإذاعية لرمضان 2011