( عدنا من جديد ) الحلقة التاسعة .......... ( سهر الليالى )

أعزائى و أصدقائى و حبايبى أعضاء و مشرفين منتدى أحباب

بجد وحشتووووووووووووونى جدا

النهارده أول حلقة لسهر الليالى من بعد الامتحانات

حلقة النهارده زى ما وعدتكم هيكون موضوعها قوى و مثير للجدل

و أيضا الضيف اللى معايا ضيف محترم جدا و من أحسن الناس اللى موجودين فى المنتدى

أولا عايز أرحب بالضيفة اللى معايا النهاردة هى واحده من أحسن أعضاء المنتدى

معايا فى حلقة النهارده


ســـــــــــــــــــــــــــــــــــــاسو



أهلا بيكى يا ساسو بجد ياقمر منورة الحلقة و أنا سعيد جدا إنى أستضفتك النهارده



و انا اسعد و بجد ميرسى اوى انك استضفتنى فى الحلقة النهاردة .






أعزائى القراء حلقة النهارده عن



الحـــــــــــــــ بعد الزواج ــــــــــــــــــــــب






لن أقول أن الحب بعد الزواج يموت

و لكنه قد يتلاشى أو يقل بنسبة ملحوظة جدا

و تبدأ المشاكل التى ليس لها حدود

لماذا دائما بعد الزواج تذهب المشاعر الجياشه و كلمات الحب بعيدا

كثير من قصص الحب تنتهى بالزواج السعيد الذى كان يتمناه الطرفان

و بمجرد مرور السنة الاولى أو بمجرد أن تلد الزوجه المولود الاول تبدأ المشاكل التى لا حصر لها





هل هذا بسبب بعدنا عن الإسلام ؟

أم أنه بسبب أن كلا الطرفين يبدأون التفكير بعقولهم بدلا من قلوبهم ؟

أم بسبب تدخل الاسرة الزوج أو الزوجه ؟






أسئلة كثيرة جدا

و لكن للاسف الإجابة صعبة



هنتناقش عن الحـــــــــــــــ بعد الزواج ــــــــــــــــــــــب

و هناخد رأى ضيفتى النهارده ( ســـــــــــــــــــــــــــــــــــــاسو )

و كمان مستنى تليفوناتكم و إتصالاتكم علشان تشاركونى فى موضوع الحلقة

و كمان هنفتح باب الرسايل علشان نحاول ناخد أكبر قدر ممكن من الاراء








هنروح لفاصل إعلانى و نرجع تانى









إستنونى







روتيتو ........................... طعم الشيبسى الاصيل








و رجعنالكم مرة تانية


خلينى أبدأ معاكى من الاول يا ساسو

عايز أسألك

هل يموت الحب بعد الزواج أم أنها مجرد أسباب مصطنعه ؟







الحب مش بيموت بعد الزواج و لكن فى اغلب الاوقات بيكونوا الزوجين ارتبطوا ببعض عن حب

لكن مش بيكونوا قدروا يكتشفوا طباع بعض فابتبدأ تدخل مشاكل بينهم لانهم مهما كانو ا

ما قدروش يدرسوا شخصية كل واحد منهم و كمان مش بيكونوا فهموا بعض .

على عكس زواج الصالونات بيكون افضل بكتير من الزواج عن حب

و كمان الحب اللى بينموا بعد الزواج بيبقى اقوى من الحب اللى قبل الزواج .

اما بالنسبة ان الحب بيموت بعد الزواج فده مش حقيقى

لكن نقدر نقول ان ظروف الحياه و العيشة الصعبة و المشاكل اللى بتمر على المتزوجين

هى اللى بتشغلنا عن الحب شوية و لكن الحب بيفضل موجود و مش بيموت .








كلامك جميل يا ساسو بالرغم من إختلافى معاكى فى نقطة جواز الصالونات ده

لانى بجد مش بعترف بيه أنه بيبقى جواز أصلا

الجواز ده شركة مده صلاحيتها بقية عمر الزوجين

بالتالى ماينفعش إنى أروح أشوف بنت و مجرد إن صفاتها الظاهرية عجبتنى إنى أقرر أكمل معاها بقية عمرى







كلامك مش غلط يا عمرو

و زى ما بيقولو الاختلاف فى الرأى لا يفسد للود قضية








عندك حق طبعا يا ساسو

معايا أول إتصال تليفونى

معايا صديق البرنامج ( حوده اللورد )

إزيك يا حوده






إزيك يا عمور ............. و الله واحشنى





و الله أنت كمان واحشنى .................... طبعا متابع الحلقة من أولها صح





صح طبعا يا عمور





طيب قولى بقى ايه رأيك قى الموضوع يا حوده





بص يا عمرو الحب مستحيل أنه يموت بعد الزواج و ده لان بعد الزواج المفروض إن الزوجين بيرتبطوا ببعض أكتر

عن طريق الاطفال و عن طريق إنهم بيعيشوا مع بعض فى بيت واحد و بيتقاسموا كل حاجة مع بعض

بس كل الحكاية إن مشاكل الحياة كتير أوى و صعبة جدا و فجأة الاب بيلاقى نفسه مسؤل عن بيت و أسرة و أطفال

و الام مسؤلة إنها تربى أولادها و تعلمهم و من هنا بتبدأ المشاكل






طيب و بالنسبة للزوجين اللى مش عندهم أطفال ؟






مش فاهمك يا عمرو






أنا قصدى إن أنت كل المشاكل اللى ذكرتها كانت بسبب الاطفال

بس فى بيوت كتير جدا مافيهاش أطفال بتنهار و بينفصل الزوجين بسبب المشاكل اللى مالهاش نهاية







أنت كلامك صح يا عمرو

بس مش يمكن عدم وجود الاطفال نفسهم هو اللى بيخلى البيوت دى تنهار








قصدك إيه يا حوده







قصدى إن المشاكل بيبقى ليها مليون سبب لكن الانفصال و إنهيار البيوت ده بيبقى قسمة و نصيب








بجد يا حوده أحسنت

أنا مش عارف أقولك إيه

أنت بجد نورت الحلقة بالمكالمة الجميلة دى







يا عمور الحلقة منورة بيك و بساسو






إنشاء الله يا حوده هستناك تكررها تانى





أكيد يا عمور









ايه رأيك يا ساسو فى الكلام اللى قاله محمود








كلامه مقنع جدا

و أكتر حاجة أنا متفقة معاه فيها هى حكاية القسمة و النصيب

لان فعلا ممكن يبقى فى عدد كبير جدا بين المشاكل بين الزوجين و يفضلوا مع بعض

و ممكن يبقى الزوجين عايشين حياتهم زى السمن على العسل و ينفصلوا علشان حاجة عبيطة جدا





واضح إن الموضوع سخن جدا

أنا معايا أول رسالة فى حلقة النهارده من .................... مــــــــــــــــــــــــــــــــــيـــار


ميار بتقول أنا متزوجة منذ 4 سنين و عندى طفل عمرة سنة و نصف و أواجه حاليا مشكلة قوية مع زوجى

قد تؤدى بنا الى الطلاق

المشكلة هى إنى أريد أن أعمل و زوجى يرفض هذا المبدأ بالاضافة الى أنه شخص عصبى

حتى أن والدته تدخلت فى الموضوع

فماذا أفعل ..................




ايه رأيك فى الكلام ده يا ساسو




على فكرة يا عمرو هى مشكلة عبيطة جدا

بس اللى خلاها كبيرة هى تدخل أهل الزوج

يعنى أنا فى رأى أن الزوج يبعد أهله و والدته عن مشاكلة هو و مراته

و إنشاء الله مش هتبقى مشكلة أصلا







ماتنسيش يا ساسو إنها قالت أنه هو شخص عصبى

يعنى كمان هى نفسها لازم تتعامل معاه بحكمه و رزانه

أنا شخصيا بنصحها أنها توافق على رأى جوزها المرة دى

و بعد كده فى قاعده صفا تفهمه وجهة نظرها و تفهمه إن ماينفعش حد يتدخل ما بينهم و أنا متأكد إنه هيوافق









هنروح لفاصل إعلاتى و نرجع لكم تانى





إبقوا معنا










جيليت ........................ ما يستحقه الرجال











و رجعنالكم تانى


معايا إتصال تليفونى


معايا ........................... ( فضفض )


أهلا بيك يا فضفض





أهلا بيك يا عمرو





يا ترى يا فضفض متابع الحلقة من أولها





أيوة يا عمرو طبعا متابعها من أولها





طيب قولى بقى وجهة نظرك فى موضوع الحلقة





بص يا عمرو

مستحيل أتنين يكونوا بيحبوا بعض و يبقوا عايشين مع بعض الحب مابينهم يموت







طيب بتفسر بأيه إرتفاع نسبة الطلاق فى المجتمع المصرى يا فضفض ؟






يا عمرو الطلاق له ملايين الاسباب

و زى ما قال محمود ده قسمة و نصيب






أيوة بس برضه كل حاجة و ليها سبب







أنا معاك إن فعلا كل حاجة و ليها سبب

و يمكن من أكتر الاسباب اللى بتؤدى للطلاق فى المجتمع المصرى بتبقى بسبب حاجة من أتنين

أولا : مشاكل فى الطباع

يعنى مثلا الزوج أو الزجة يصبح عصبى زياده عن اللزوم

أو فجأة لا تهتم الزوجة بمظهرها و شكلها




ثانيا : الاطفال

بيتهيقلى إن أكتر من 50 % من حالات الطلاق فى الوطن العربى بتبقى بسبب إن أحد الطرفين بيبقى عقيم

و ده موضوع تانى و الكلام فيه كتير جدااااااااااااااااااا




ده طبعا على سبيل المثال و ليس الحصر يا عمرو




كلامك ممتاز يا فضفض

فعلا بجد نورت الحلقة





الله يخليك يا عمرو

أنت اللى منور البرنامج كله أنت و ساسو







هرجع لساسو

كنت عايز أسألك سؤال يا ساسو

لماذا يتهم الرجل زوجته بعد شعورها بالمسئوليه و تتهم المرأة زوجها بعدم الاهتمام أو العكس ؟







ده لان الزوج بيبقى دايما مشغول بعمله فقط فهو يضع كل إهتمامه فى كيف ياتى بالاموال الى البيت

أما الزوجة فهى تضع كل إهتمامها فى بيتها لكى تهئ حياة سعيده لابنائها

و على فكرة يا عمرو

كل الازواج اللى بيواجهو المشكلة دى لازم بيبقى عندهم أطفال

و ده لان المشكلة دى سببها إن الاب و الام بيضعوا كل إهتمامهم على اطفالهم فقط

و ينسى الزوج زوجته و تنسى الزوجه زوجها










طيب قوليلى يا ساسو

هل فعلا الزواج هو سجن كما يصفه الكثيرون ؟









لا طبعا الزواج ده عمره ما كان سجن بالعكس طول ما فيه مودة بين الزوجين

بيبقى جنة صغيرة و لكن الاهم فى ذلك هو المعاملة الطيبة من الطرفين

و الاهتمام و الاحترام المتبادل بينهم

وحسن المعاملة حتى لا يشعر احدهما بالاختناق و انه اصبح سجين و يبدا بقى

يمل من الحياة الاسرية .

وده بردك بيكون بحسن الاختيار ، و كذلك اللمام الزوجين بفن التعامل مع كل منهما الاخر








يعنى أنتى قصدك إن الزوجين يكونوا متفاهمين فى حياتهم مع بعض

و يتجنبوا المشاكل بكل أنواعها










أكيد يا عمرو










طيب قوليلى بقى

هل فعلا من المستحيل أن يبقى الحب بعد الزواج كما كان فى فترة الخطوبة ؟








اه طبعا لان حب الخطوبة بيبقى حب وردى كله احلام رومانسية و حياه هادية

لكن حب الزواج بيتحول الى حب امان و مسئولية يعنى بيبقى حب اقوى

مكلل بهدف و حب غرضه الحفاظ على تلك الاسرة

و تلبية طلبتها ( حب الزواج هو الاقوى ) .












هنكمل كلامنا عن الحـــــــــــــــ بعد الزواج ــــــــــــــــــــــب




و لكن




بعد الفاصل










كوكاكولا ...................... الراعى السمى لكأس العالم 2010









أهلا بيكم فى الجزء الاخير من حلقة النهارده








لكل داء دواء

و لكل مشكلة حل

الله سبحانه و تعالى كما خلق الداء خلق له دواء

و كما خلق المشكلة خلق لها الحل الذى يجعلنا نحل هذه المشكله

و لكن من الممكن أن تكون الحلول أمام أعيننا و نحن لا نراها و نظل نبحث عنها طوال العمر

و لابد من وجود حل سحرى لكى يتجنب الازواج هذه المشاكل التى قد تهدم العديد من البيوت و تتسبب فى إنفصال العديد من الازواج



فى رأيك يا إسراء إيه هو الحل السحرى اللى ممكن يتبعه المتزوجين لتجنب المشاكل التى قد تؤدى إلى الطلاق ؟








المعاملة بما يرضى الله و الاحترام المتبادل بينهم ( دول الحل السحرى )

لانك لما بتعاملها بما يرضى الله و تخاف ربنا فى المعاملة عمرك ما حاتلاقى مشاكل

موجودة بينهم ، و كذلك الاحترام المتبادل و احترام وجهة نظر الاخر

دى بتشعرك بالاهتمام و كمان بقى بالنسبة للبنات

تحاول ما تثيرش استفزاز زوجها يعنى بالبلدى كدة ( تمشى حالها عشان المراكب تمشى )










معايا إتصال تليفونى


معايا أحد مشرفات المنتدى بأسم ( فضفض )




إزيك يا فضفض ................. منورة الحلقة النهارده





ميرسى يا عمرو الحلقة منورة بيك أنت و ساسو





مستحيل أن يكون هناك حياة بلا مشاكل أو عقبات

و لكن لكل مشكلة حل

فى رأيك يا فضفض كيف يتجنب الازواج المشاكل المؤثرة فى حياتهم ؟









الحكاية بسيطة جدا يا عمرو

الزواج ده زى ما أنت قولت هو شركة بتدوم العمر كله

و علشان الشركة تكمل طريقها للنهاية بدون مشاكل

لازم يبقى فى تبادل أراء و إحترام وجهات نظر

ولازم يبقى متبادل بين الزوجين

مفيش أحسن من النقاش و الفضفضه لانها هتقصر المسافات بين الزوجين

و هتخليهم يقطعوا أكتر من نص الطريق

و كمان يا عمرو لازم يلتزموا بقواعد الشريعة الاسلامية فى التعامل بينهم لانه بجد هيوفر عليهم كتير جدا










فعلا يا فضفض الله ينور عليكى

بجد ده اللى نقدر نقول عليه حل سحرى لمشاكل الزواج


بجد يا قمر أنتى نورتى الحلقة بمكالمتك دى

و أكيد هستنى تكرريها تانى





أكيد يا عمرو











فى رأى الشخصى المتواضع

الحياة الزوجية السعيده تقوم على الاحترام المتبادل

و من وجهة نظرى لكى يستمر الحب بعد الزواج يجب إتباع 4 أشياء






1 - هذه النقطة مطلوبة من الرجل وحده وهى الحلم الشديد والعدل الشديد والرأفة الشديدة والتسامح ..وأن يتعامل الزوج مع

زوجته بمنتهى الرحمة فلا يؤذيها ولا يهينها ولا يمنعها من زيارة أهلها ولا يترصد لها الاخطاء ثم يحاسبها عليها حساباً شديداً.

ليس معنى ذلك أن نطالبه بعدم الحزم إنما الأصل فى تعامله مع زوجته هو الرحمة والتسامح والعدل والطبطبة وهذه المسألة تظل

المرأة تحملها للرجل فى عينيها إذ لا يمكن لإمرأة يتعامل زوجها معها بهذه الطريقة فتتمادى فى الخطأ. التجربة الانسانية تقول

ذلك ومهما كانت الزوجة تحمل فى نفسها زعلا من أخطاء الرجل لكنها تشهد بأنه لم يتعمد إيذاءها. المرأة تحتاج إلى الرجل الذى

يحمل إلى جانب القوة حناناً.

ومهما كانت المرأة تحب الرجل ثم عيرها هذا الرجل بأهلها أو أهانها أمام الاخرين أو قسى عليها فإن هذا الحب سرعان ما يتبدد

مهما كان يملأ قلبها .







2- اللوم ..سر النكد

النقطة الثانية مسؤلية المرأة .هناك أزواج يتمادين فى لوم الازواج على كل خطأ يقع منه ..وهى بذلك تسبب النكد فى البيت

وتخفض معنويات الزوج ..فإذا أراد مثلاً أن يحكى لها عن مشكلات واجهها فى عمله تمعن فى لومه وتقريعه .

وهو حين تزوجها ظن أنه سيجد فيها الصديق الذى يفضفض له بهمومه والصدر الحنون الذى يحتويه ..فحواء سميت حواء لأنها قادرة

على الاحتواء لكنه يجد فيها عكس ما تمنى فهى لا تريد سماعه,وهى لا تتقبله فتكون النتيجة أنها تخسره وإنه يذهب لمن

يسمع إليه ويرفع معنوياته ولا يلومه .وأنا هنا انصح الزوجة بأن تستمع كثيراً إلى الزوج وترفع معنوياته ولا تلومه إلا قليلاً فى الاخطاء

التى لا يمكن السكوت عنها وأن تقول له فى المحن والشدائد :لا تخف فإن الله معنا وهو لن يضيعنا.

لا نريد للزوج أن ينصرف عن زوجته بحجة أنها لا تفهمه ..وأنها تكيل له دائماً اللوم والتوبيخ .








3- هدف مشترك للزوجين

النقطة الثالثة فى روشتة السعادة الزوجية مطلوبة من الزوجين معاً ما الذى يؤدى إلى برود الحب فى البيوت والقلوب ؟كيف تبرد

العاطفة المتأججة والمشتعلة فى صدور الأزواج والزوجات ؟

تبرد المشاعر حين يصبح كل من الزوج والزوجة فى طريق وحده يفكر وحده ويفعل ما يشاء وحده .

وأنا انصح الازواج أن يحرصوا على وجود هدف مشترك تتجمع حوله الأفئدة والعقول لتظل العلاقة دافئة وحميمة .

أنا شاهدت رجلاً وزوجته فوق الستين من العمر وكان حبهما لبعضهما يفوق الوصف ..وسر هذا الحب أنهما اتفقا على هدف

مشترك هو العمل معاً على أن يكون الحى الذى يسكنانه انظف الأحياء وأجمل الأحياء وأكثر الأحياء تديناً .

بدأ كل منهما يفكر فى إنشاء جمعيات خيرية لتنظيف وتجميل العمارات المجاورة وجمعية للمساعدة فى تزويج أبناء وبنات الحى

وتحول الحى بفضلهما إلى ساحة للعلاقات الاجتماعية الزاقية جداً .وأعرف رجلاً آخر وأمرأة كتبا أهداف زواجهما فى وثيقة يحتفظان

بها معلقة على حائط غرفة النوم .










4- أفضل علاج للبرود العاطفى

النقطة الرابعة ..نقطة غالية جداً تجلب الحب الفورى ,وتجعل الحب يقفز فى القلب مباشرة وهى أن يعبد الزوج والزوجة الله معاً.

المشكلة أن الرجل حين يصلى فى البيت يصلى وحده والمرأة حين تصلى تصلى أيضاً وحدها .

لماذا لا نعبد الله معاً ؟

تصور الذى يصلى مع زوجته ركعتين كل ليلة خميس هل سيتشاجر معها من أجل زرار قميص مخلوع ؟

تصور لما يقول لها :صحينى الفجر لنصلى معاً .

الذين يفعلون ذلك هل سيتشاجران فى الصباح لأن طعم الفول به ملح زائد ؟الحب بلا شك يأتى بالفسحة الجميلة والأكلة الحلوة

والهدية الرقيقة ..هذه أشياء بلا شك مهمة لنمو الحب وترعرعه فى القلوب لكن أكثر شىء يدعم الحب فى البيوت أن يعبد الزوجين الله معاً فالله سبحانه هو الذى قال {وأنه هو أضحك وأبكى} هو الذى يزرع السعادة فى القلوب .

وانا رأيت أزواجا وزوجات وصلوا إلى مرحلة من البرود العاطفى لا يمكن تصورها قلت لصدبق أصابه البرود العاطفى بضزاوة:هل يمكن

أن تصلى مع زوجتك ركعتين كل أسبوع ؟قال نعم .

بعد أسبوعين فقط جاءنى هذا الصديق الذى كان يقول أنه لا يطيق زوجته ليقول لى :علاقتى بها اصبحت وثيقة جداً وأحس الأن

أننى أحبها جداً ولم يجد أى جديد فى حياتهما سوى أنهما عبدا الله معاً .

ماذا يحدث لو خرجت للعشاء مع زوجتك فى سيارتك وقلت لها :تعالى نسبح الله لمدة خمس دقائق فقط قبل أن نذهب للعشاء ؟

هذه أخر وصية فى روشتة السعادة الزوجية لمن يبدأون حياتهم فى شهر العسل ولمن يعيشون حياة زوجية ممتدة ويريدون

استمرار الحب وعدم خفوت جذوته فى القلوب .









معلش أنا اسف على الاطالة بس هى دى وجهة نظرى علشان نتجنب المشاكل فى الحياة الزوجية



و فى نهاية الحلقة عايز أشكر القمراية ســـــــــــــــــــــــــــــــــــــاسو

بشكرك يا ساسو بجد بجد نورتينى يا قمر و نورتى الحلقة و البرنامج كله كمان









انا اللى بشكرك كتير اوى و ميرسى على الحلقة الجميلة دى .











فى نهاية الحلقة بشكر كل اللى تابعنى النهارده

و تابع البرنامج

طبعا مستنى ردودكم علشان أعرف رأيكم فى حلقة النهارده

و إيه رأيكم فى كلامى و كلام ضيوفى

هسيبكم دلوقتى مع النجمه جوانا ملاح

و أغنية هتفضل فى قلبى

أشوفكم إنشاء الله الحلقة اللى جاية و موضوع جديد و ضيف جديد