الحب
الله على الكلمة دى .....
جميلة ....رقيقة .....حساسة...
صادقة...بريئة ..ما حدش قدر يعرف الحب غير انة حب
ان كنت عاوز تعرف يعنى اية حب تعالا نعمل التجربة البسيطة دى مع بعض
غمض عينك . تغمض مش تنام ها ( بس بعد ما تخلص قراءة طبعا )
اسرح شوية كمان ..كمان ..شوية كمان . والنبى كمان ..بس كفاية كدة
استحضر صورة واحد بتحبة قوى فكر فية
مثلا .... واحد صاحبك بتفضفضلة مشاكلك وهمومك بتحس انك لما
تكلمة بترتاح بعد ما بتكون حاسس أن الدنيا كلها فوق دماغك ...
بتخرجوا مع بعض .. بتا كلوا مع بعض ..عارف اهلك وأهلة عارفينك
...جدع جدا معاك ..
السؤال بقى : إذا غاب عنك كام يوم بعد ما كنت بتشوفوا كل يوم هتحس بأية !!!! وحشك اوى.... مش كدة
هو دة الحب
ها ادينى سهلتها عليك .. جرب لوحدك المرة دى اقعد وافتكر لما تكون
تعبان ... ونايم فالسرير سخن وبتكح وحالتك صعبة !!
وبتقول اه .. وما فيش جنبك غير امك قاعدة بتنام على
( يارب اشفى ابنى ) نفسك تقول اية ساعتها !!
هو دة الحب
معلش جرب تانى .... وأنت بتقلب فالتلفزيون ..ولقيت واحد بيشتم
فدينك ونبيك وبيقول كذا وكذا وانت عارف أنة كداب
نفسك تعمل اية وقتها? تاكلة مش كدا !!
علشان بتغير على دينك وبتحبة
هو دة الحب
ماشى فالشارع لقيت واحد بيدور على اى حاجة ياكلها .. صعب عليك
المنظر قمت حطيت ايدك فجيبك واديتة اللى قدرت علية
وطيبت خاطرة بكلمة حلوة ...
بتحب تعمل الخير والحمد لله ..
هو دة الحب
بتحب امك وبتحب ابوك بتحب اختك واخوك
هو دة الحب
بتحب بيتك والشارع بتاعك
وبتحب بلدك رغم كل حاجة نفسك انها تتصلح
وتبقى احسن بلد فالدنيا ??!..
هو دة الحب
وطبعا وطبعا وقبل كل دة بتحب ربك
وبتحب رسولك ( صلى الله علية وسلم )
وهو دة الحب الاكبر
هو دة الحب
ما عرفناش نكتب لة تعريف الا انة حاجة ما تتكتبش
الحب احساس جميل ما يتوصفش
هتسالنى طبعا بعد كل الكلام الجميل دة اللى انا قولتة دة امال الحب
اللى الناس بتتكلم علية يبقى اية !!
للأسف اكتر كلمة اهينت واهين معناها السامي هي كلمة الحب ,
بأختصار اللى بنشوفة فى الأفلام والمسلسلات وللأسف فى الجامعة
والشارع مش حب دة بالعربي كدة استظراف – تسلية – تضيع وقت –
ضحك على بنات الناس ..... اى حاجة زى كدة غير انة يتسمى حب أبدا .
معظم هذة الحالات التى يحسب اصحابها انهم يحبون لا تنتهي بالزواج
ودة معناه تأثير نفسي كبير على الطرفين وللأسف التأثير دة بيستمر
حتى بعد ما كل واحد من الطرفين يتجوز
أليكم هذين المشهدين الحقيقين :
مشهد رقم 1 المكان أحدى الكليات فى الجامعة المصرية
البنت : إحنا قربنا نخلص الترم التانى ودي أخر سنة والحمد لله , وأظن
يا ( ....) ان الوقت المناسب انك تتقدم لبابا
الولد : نعم ...اه ....بس ....
البنت : بس اية ؟
الولد : بصراحة كدة انا مش جاهز خالص , انا أساسا لسة هدخل
الجيش وبعدين يا عالم انا هشتغل امتى ولسة هحوش , بصراحة كدة
يا (.....) انا مش عايزك تتبهدلى معايا شوفي طريقك
البنت : يعنى الأربع سنين اللي فاتوا ضاعوا و ....
الولد : بصى بقى من الأخر أنا ما اتجوزش واحدة بتمشى مع شباب ..... مع السلامة
مشهد بيتكرر كتير واليكم هذا المشهد المشابه ......
مشهد رقم 2 المكان نفس المكان السابق :
الولد : ان شاء الله يا (....) اول ما النتيجة تطلع واتخرج هتقدم لوالدك
علطول يعنى هانت ....
البنت بصراحة يا (...) انا متقدملى عريس لقطة
الولد : انتى بتقولي اية ؟
البنت : خلينا عمليين يا (......) أنت لسة هتدور على شغل , وامتى
بقى هتجمع فلوس الجهاز والشبكة بصراحة إحنا مش لبعض ........
مع السلامة
للآسف المشاهد دي بتتكرر كتير وشفناها كتير فالجامعة وفى غير الجامعة
هذا الحب وهم ليس حبا طاهرا شريفا كما يقولون فأنة ينال أول ما ينال
من سمعة الفتاه وأهلها
الحب الطاهر يكون حب الزوج لزوجتة وحب الزوجة لزوجها هذا هو
الحب الذى علمنا إياه محمد بن عبد الله
( صلى الله وعلية وسلم ) الذى سئل أمام الصحابة من أحب الناس
أليك ؟ فقال عائشة .
الحب كلمة عظيمة طاهرة ...
الحب غريزة لا نستطيع الاستغناء عنها ولذلك شرع الله لنا الحلال وعدد
انواعة ومنها بالتأكيد حب الرجل للمرأه
وحب المرأه للرجل ولكن الكثير منا لا يوزع عواطفة بالطريقة الصحيحة
ولا يراعى حدود الله التى امرنا بها الله فى المعاملة بين الجنسين وزع
عواطفك واملآ قلبك بألوان من الحب
تكن اسعد الناس
وفى النهاية لا أنسى ان أقول
أنى أحبكم فى الله